Líkindi með François Hollande og Árna Páli Árnasyni

Mótmæli gegn François Hollande við Bastillinu 5. maí 2013

Eitt ár er liðið í dag frá því að François Hollande var kjörinn forseti Frakklands og fólk fjölmennti á Bastillutorgið í París með rauða fána, verkamenn, menntamenn og námsmenn með tárin í augun til að fagna endurkomu sósíalista í embætti forseta Frakklands segir Stefan Simon í Der Spiegel og bætir við að nú hafi fólk komið saman að nýju á torginu við Bastilluna, þar hafi staðið fulltrúar Vinstrifylkingarinnar, kommúnistar og aðgerðasinnar til að mótmæla forsetanum.

Sama hvert litið er alls staðar draga fjölmiðlar dökka mynd af stöðu mála í Frakklandi ári eftir að Hollande hlaut kosningu til að taka við af Nicolas Sarkozy. Staðan í Frakklandi einkennist af atvinnuleysi, vonleysi á æðstu stöðum og klofningi í samfélaginu.

Süddeutsche Zeitung segir það til marks um hve illa François Hollande hafi haldið á málum að boðuð hafi verið sala á eðalvíni úr kjallara forsetahallarinnar Elysée. In vino veritas segir blaðið og telur að sannleikurinn um fjárhag franska ríkisins felist í sölu forsetavínsins.

Franska vikublaðið L‘Express kallar Hollande „Monsieur Faible“ herra veikling og breska blaðið The Daily Telegraph notar sömu nafngift til að lýsa stöðu forsetans. Í The Guardian reynir leiðarahöfundur að bera í bætifláka fyrir Hollande með því að segja að ekki sé unnt að dæma feril neins stjórnmálamanns eftir 100 daga og ekki heldur eftir eitt ár. Blaðið telur að Hollande hafi orðið „fórnarlamb eigin velgengni“ með sterkan meirihluta á þingi og mikið vald samkvæmt stjórnarskránni. Hann hafi enga afsökun fyrir að „mistakast“ eins og Barack Obama sem ráði ekki yfir meirihluta í fulltrúadeild Bandaríkjaþings. The Guardian segir hins vegar að vandi Frakklandsforseta sé að hann geti ekki tekið ákvarðanir, hann hafi aðeins sýnt hugrekki með innrás í Malí.

Bresku blöðin eru sammála hinum þýsku um að meira sundurlyndi ríki í Frakklandi undir stjórn Hollandes en Sarkozys og þetta sé furðuleg niðurstaða því að Hollande hafi sest í embætti forseta með þau orð á vörunum að hann vildi stuðla að sáttum og draga úr sundrungu sem hafi verið einkenni stjórnarhátta Sarkozys.

Samfylkingin á Íslandi og vinstrisinnar almennt fögðnuðu kjöri François Hollandes fyrir ári og töldu hann fyrirboða um það væri í vændum hér á landi 27. apríl 2013. Þeir reyndust sannspáir, Samfylkingin stendur í svipuðum sporum og franskir sósíalistar, traustið er horfið og einnig fylgið.

Bj. Bj.