Noregur: Upplýst í dagblaði um stórtækt rafrænt njósnakerfi sem nær til þingmanna og ráðherra

Norska blaðið Aftenposten hefur afhjúpað svonefndar grunnstöðvar í hjarta Oslóar sem má nota til að hlera farsíma og fylgjast með eigendum símanna. Staðarval fyrir stöðvarnar benda til að þær séu notaðar til að fylgjast með því sem gerist í stórþinginu og á stjórnarskrifstofum landsins.

Úr sal norska stórþingsins.

Um er að ræða leynilegan búnað sem enginn veit hver á eða hefur komið fyrir á stöðum nálægt stórþinginu, ráðuneytisbyggingum og bústað forsætisráðherrans. Starfsmenn Aftenposten hafa í samvinnu við sérfróða einkaaðila unnið í tvo mánuði að öflun upplýsinga sem sýna hvar finna megi hlerunar- og eftirlitsstöðvarnar.

Ekkert hinna opinberu stjórnvalda í Noregi sem hefur heimild til að reka slíkar stöðvar kannast við að eiga stöðvarnar sem sagt er frá í Aftenposten. Það er því óljóst hver stendur að baki stöðvunum eða hvaða tilgangi þær þjóna.

Í Noregi hefur aðeins lögreglan, öryggislögreglan (PST) og þjóðaröryggisdeildin heimild til að nýta tæknibúnað af þessu tagi. Þeir sem hafa aðgang að tækjunum sem sagt er frá Aftenposten geta í raun skráð ferðir allra á svæðinu undir eftirliti tækjanna. Þar á meðal alla sem fara inn eða úr þinghúsinu. Þá segir blaðið að einnig sé unnt að hlera farsíma þeirra einstaklinga sem vekja áhuga hverju sinni.

Aftenposten birti frétt sína um málið föstudaginn 12. desember en daginn áður hafði blaðið sagt norsku leyniþjónustunni frá því. Segir blaðið að í framhaldi af því hafi rétt norsk yfirvöld hafið rannsókn á málinu.

Laugardaginn 13. desember segir í frétt NTB-fréttastofunnar norsku að stórþingsmenn vilji fá greinargerð frá ríkisstjórninni um þetta mál annaðhvort á opnum stórþingsfundi eða lokuðum nefndarfundi. Þingmennirnir lýsa undrun yfir að þeir lesi fyrst um það í dagblaði að þeir kunni að vera undir smásjá einhverra ókunnra afla sem geti meira að segja hlerað farsíma þeirra. Svo virðist sem þessi starfsemi hafi farið fram hjá þeim sem sinni opinberri öryggisgæslu.

Bj. Bj.