Mosvka logar í kjaftasögum vegna fjarveru Pútíns - sagður veikur eða hjá ástkonu í Sviss

Spurningin um hvers vegna Vladimír Pútín Rússlandsforseti sjáist hvergi og hafi hvergi birst opinberlega í rúma viku er meðal höfuðfrétta í The New York Times (NYT) laugardaginn 14. mars. Forsetinn aflýsti í skyndi ferð til Kazakhstan og frestaði undiritun samnings við fulltrúa Suður-Ossetíu sem var sagt að leggja ekki á sig ferð til Moskvu. Það sem vakið hefur mesta undrun er að hann tók ekki þátt í ársfundi forystumanna FSB, rússnesku öryggis- og njósnastofnunarinnar.

Vladimir Pútín

Í NYT segir að kjaftasögur um forsetann hafi farið á flug undanfarið. Hann sé sagður mjög illa haldinn af skæðri inflúensu sem herjar á Moskvubúa um þessar mundir. Hann hafi laumast til Sviss til að vera við fæðingu barns með ástkonu sinni. Hann hafi fengið heilablóðfall. Hallarbylting hafi verið gerð gegn honum, hann sé fangi í Kreml. Hann sé dáinn, 62 ára að aldri.

Dmitri S. Peskov, talsmaður forsetans, hefur ekki við að endurtaka að forsetinn sé við „góða heilsu“. NYT segir að honum hafi hins vegar ekki tekist að slá á orðróminn um heilsuleysi Pútíns og það sé í samræmi við hið sérkennilega andrúmsloft sem ríkt hafi í Moskvu mánuðum saman þar sem hræðsla við það sem kunni að gerast við fráfall eins manns og val á eftirmanni hans.

Stundum skynji menn að bakvið háa múra Kremlar ríki spenna vegna ágreinings um réttmæti þess að beita valdi í Úkraínu sem leiði aðeins til þess að gengi rúblunnar falli enn frekar undan sameiginlegum þunga af lækkun olíuverðs og refsiaðgerðum Vesturlanda eftir innlimun Krímar í Rússland.

Eftir að Boris Nemtsov helsti opinberi stjórnarandstæðingurinn í Rússlandi var myrtur hinn 27. febrúar hefur andrúmsloftið kringum Kremlverja enn versnað. Við þetta hafa vangaveltur um Pútín einnig tekið á sig annan blæ.

Andrei Illarionov, fyrrverandi ráðgjafi Pútíns, sagði á bloggi sínu að harðlínumenn hefðu velt forsetanum úr sessi að undirlagi rússnesku rétttrúnaðarkirkjunnar. Rússar gætu vænst þess að innan tíðar yrði sagt að hann hefði tekið sér verðskuldaða hvíld frá störfum.

Sé leitað eftir upplýsingum um Pútín hjá embættismönnum Bandaríkjaforseta koma menn að tómum kofanum. Þar segist blaðafulltrúinn eiga fullt í fangi með að fylgjast með ferðum eins þjóðhöfðingja.

Síðast kom Pútín fram opinberlega, svo vitað sé, hinn 5. mars 2015 á blaðamannafundi með Matteo Renzo, forsætisráðherra Ítalíu. Innan Kremlar vilja menn hins vegar bregða upp annarri mynd.

Dagblaðið RBC sagði að fundur með landstjóra Karelíu-héraðs sem sagt var frá með mynd á vefsíðu forsetaembættisins hinn 11. mars hefði í raun verið haldinn hinn 4. mars. Þá hefði verið látið eins og Pútín hefði hitt fulltrúa kvenna sunnudaginn 8. mars en það hefði hann gert 6. mars.

Föstudaginn 13. mars birtist á vegum Kremlar myndband og ljósmynd af Pútín á tali við forseta hæstaréttar Rússlands um umbætur á dómstólakerfinu. Mikið var gert úr þessum myndum á ríkisreknum sjónvarpsstöðvum en NYT segir að þar sem ekki hafi verið um beina sendingu að ræða hafi þær ekki slegið á kjaftaganginn.

Einfaldasta skýringin á fjarveru Rússlandsforseta er sögð koma frá Kazahkstan þar sem stjórnarerindireki sagði við fréttamann Reuters „svo virðist sem hann hafi veikst“. Vegna slæmrar flensu í Moskvu sem kippir mönnum dögum saman „úr umferð“ virtist þetta líklegasta skýringin.

NYT segir að meðal mann

Bj. Bj.