Mario Draghi segir ósanngjarnt að ráðast á Seðlabanka evrunnar vegna niðurskurðar og aðhalds

Mario Draghi, forseti bankastjórnar Seðlabanka evrunnar (SE), sagði miðvikudaginn 18. mars að það væri „ósanngjarnt“ að segja bankann helstu uppsprettu niðurskurðar og aðhalds í Evrópu eins og mótmælendur sem hafa ráðist að nýjum höfuðstöðvum bankans gera.

Tvíburaturnar Seðlabanka evrunnar í Frankfurt

Við athöfn í tilefni þess að bankinn er að flytja í nýja tvíburaturna í Frankfurt sagði Draghi að bankinn drægi nú að sér þessa neikvæðu athygli þeirra sem hafa fengið nóg af ástandinu vegna þess að hann hefði gegnt lykilhlutverki við lausn á skuldakreppu evrunnar. Hann sagði:

„Þessar ásakanir eru næsta ósanngjarnar – aðgerðir okkar hafa einmitt miðað að því að draga úr efnahagsáföllunum. Sem seðlabanki alls evru-svæðisins verðum við hins vegar að hlusta mjög náið á það sem samborgarar okkar segja.“

Miðvikudaginn 18. mars var efnt til formlegrar athafnar til að staðfesta að SE hefur flutt í tvo 185 m háa turna í austurhluta Frankfurt sem kostaði 1,3 milljarða evrur að reisa. Starfslið bankans hóf störf í byggingunum í fyrra.

Utan dyra stóðu lögreglumenn gráir fyrir járnum og héldu hundruð aðgerðasinna í skefjum. Kveikt hafði verið í bílum, grjóti var kastað en síðdegis er boðað til fjöldafundar í hjarta borgarinnar.

Var búist við að 10.000 manns kæmu víða að í Þýskalandi og Evrópu til að taka þátt í mótmælunum. Boðað er að 800 mótmælendur komi með lest frá 60 langferðabílar eru væntanlegir með þátttakendur frá 39 ólíkum borgum.

Aldrei fyrr hefur lögreglan í Frankfurt kallað út jafnmikinn liðsafla vegna mótmæla í borginni.

Heimild: AFP-fréttastofan.

Bj. Bj.