Bretland: Koma rússneskir óligarkar í staðinn fyrir Murdoch í blaðaheiminum?

Rupert Murdoch

Rupert Murdoch, ástralski blaðakóngurinn, sem er 81 árs að aldri, hefur nú sagt af sér úr stjórnum þeirra fyrirtækja, sem annast útgáfu blaða hans í Bretlandi, The Times, The Sunday Times og The Sun. Skýringarnar, sem eru gefnar eru þessar: Murdoch hefur ákveðið að skipta útgáfufyrirtæki sínu í tvennt. Annars vegar fyrirtækið, sem á Fox-sjónvarpsstöðina, stóran hlut í Sky, kvikmyndagerðarfyrirtæki í Hollywood og önnur fyrirtæki í skemmtanaiðnaði en þessi rekstur stendur að baki um 90% af tekjum fjölmiðlaveldis Murdochs. Hins vegar verður fyrirtæki, sem sér um útgáfu blaða, m.a. í Bretlandi.

Þótt Murdoch hafi orðið illa úti í umræðum í Bretlandi á undanförnum mánuðum og þingmaður sagt að hann væri óhæfur til að eiga fjölmiðil, sem er skilgreining, sem hefur lagalega þýðingu þar í landi, hefur úrsögn Murdochs valdið áhyggjum. Ástæðan er sú, að grunur læðist ekki sízt að starfsmönnum blaðanna, að hann hyggist selja hlut sinn í þeim og hætta afskiptum af blaðaútgáfu í landinu.

Þessu er mótmælt af hálfu talsmanna Murdochs en augljóst af fréttum, að þau mótmæli duga ekki til að hreinsa þessar grunsemdir út.

Nú mætti ætla í ljósi umræðna síðustu mánaða að brottför Murdochs úr brezkum blaðaheimi yrði fagnað. Svo er ekki einfaldlega vegna þess, að ekkert liggur fyrir um að einhver annar sé tilbúinn til að greiða tapið af rekstri sumra þessara blaða.

En auðvitað er huganlegt að rússneskir ólígarkar komi til sögunnar. Þeir eru byrjaðir að kaupa upp blöð í Bretlandi.

SG