Hvað eiga Íslendingar af 21 trilljón dollara í skattaskjólum?

Frétt brezka sunnudagsblaðsins Observer í gær um að 21 trilljón dollara væri geymd í skattaskjólum víðs vegar um heim hefur að vonum vakið mikla athygli enda ljóst að eðlilegar skattgreiðslur af þessari upphæð kæmu sér vel fyrir margar þjóðir. Nú er um það rætt í Bretlandi að hefja birtingu á nöfnum þeirra, sem skjóta sér með þessum hætti undan eðlilegum skattgreiðslum. Þar hefur verið nefnt dæmi um einstakling, sem hefur komizt upp með að greiða 1% í skatt af miklum tekjum.

Fréttin vekur hins vegar upp þá spurningu hér á Íslandi hvernig skattayfirvöldum gangi að afla upplýsinga um eignir Íslendinga í skattaskjólum. Nú er auðvitað vel hugsanlegt að þar séu geymdir peningar, sem eiga uppruna sinn hér og skattar hafi verið greiddir af en það er áleitin spurning, hversu líklegt er að Íslendingar, sem kunna að hafa komizt yfir mikla fjármuni, þegar bólan var sem stærst hafi staðizt þá freistingu, sem annarra þjóða fólk hefur ekki staðizt.

Eftir því sem lengra líður frá Hruni aukast líkur á því að reynt verði að koma þessum peningum til Íslands og nýta þá með ýmsum hætti til að kaupa fyrirtæki eða koma nýjum af stað.

Um það er ekkert nema gott að segja svo fremi sem ljóst sé að fjármagnið hafi orðið til með eðlilegum hætti og af því greiddir skattar svo sem vera ber.

SG