Spiegel: Er Libor-málið mesta fjármálahneyksli sögunnar?

Libor-hneykslið er að vinda upp á sig ef marka má ítarlega umfjöllun um málið í þýzka tímaritinu Der Spiegel, sem segir að bæði rannsóknaraðilar og stjórnmálamenn telji að um „skipulagða svikastarfsemi“ hafi verið að ræða. Sumir aðilar á fjármálamarkaði í Evrópu telja að Libor-málið sé mesta fjármálahneyksli sögunnar.

Spiegel segir að Deutsche Bank hafi hafið eigin rannsókn á málinu haustið 2011. Farið hafi verið í gegnum milljónir tölvupósta. Endurskoðendur hafi verið ráðnir utan bankans og um 50 manns starfað að rannsókninni. Þeir hafi hins vegar ekki komizt á skrið með rannsóknina fyrr en brezk yfirvöld hafi gefið upp nöfn tveggja miðlara, sem vöktu grunsemdir. Þá hafi þáverandi aðalforstjóra Deutsche Bank, Josef Ackermann verið gerð grein fyrir stöðunni og eftir það hafi hann óskað eftir vikulegum skýrslum. Jafnframt hafi tveir starfsmenn verið reknir.

Spiegel segir bankann halda því fram, að aðrir innan bankans hafi ekki verið aðilar að svindlinu og að bankinn sjálfur hafi ekki hagnast á því en tímaritið spyr hvort það geti verið og af hverju hvorki yfirmenn né regluverðir hafi gert sér grein fyrir hvað var að gerast.

Nú stendur yfir rannsókn í London, New York og Brussel. Einn eftirlitsmaður segir að kerfi séu komin í gang, sem hann hafi hingað til einungis þekkt úr kvikmyndum um Mafíuna. Stjórnendur banka liggja undir miklum þrýstingi. Framkvæmdastjórn Evrópusambandsins hóf á síðasta ári málaferli gegn nokkrum bönkum. Meira en 40 bankar hafa komið á framfæri upplýsingum um vafasöm vinnubrögð. Yfir bönkunum vofa háar sektargreiðslur. Lítil einkafyrirtæki á fjármálamarkaði eru að hefja málaferli. Um 20 mál eru í gangi í Bandaríkjunum. Þýzkir lögfræðingar eru að hefjast handa.

SG