Vaxandi efasemdir um samskiptamiðla sem auglýsingavettvang

Fjölmiðlaheimurinn er búinn að vera í viðskiptalegu uppnámi í mörg ár. Augljóst er að pappírinn er að víkja fyrir lestækjunum. Síðusu tölur frá Amazon sýna meiri sölu á bókum í gegnum Kindle en með hefðbundnum hætti. En auglýsendur eiga erfitt með að fóta sig í þessum nýja heimi og vita ekki í hvorn fótinn þeir eiga að stíga. Og nú er meira og meira talað um að sjónvarp eins og við þekkjum það fari alveg yfir á netið, sem getur gjörbreytt þeim þætti í fjölmiðlarekstri. Sumt af því sjónvarpsefni, sem framleitt er á ritstjórnarskrifstofum dagblaða og sent út á netútgáfum þeirra er áhugaverðara en það sem hinar hefðbundnu sjónvarpsstöðvar senda frá sér.

Inn í þessa mynd koma svo hinir nýju samskiptamiðlar eins og Facebook og Twitter. Og þótt „umferð“ fólks um þá sé mikil eru meiri og meiri efasemdir hjá auglýsendum um að auglýsingar þeirra þar skili sér í auknum viðskiptum.

Fyrir nokkrum mánuðum vakti athygli, þegar General Motors tilkynnti að fyrirtækið mundi draga úr umsvifum á Facebook. Verð hlutabréfa í þeim samskiptamiðli hefur hrunið frá útboðinu fyrr í sumar.

Nú bendir ný könnun, sem Sunday Telegraph hefur fengið aðgang að til þess að fjármálafyrirtæki hafi dregið mjög úr auglýsingum á samskiptamiðlum. Á síðasta fjórðungi 2011 benti könnun til þess að 22% fyrirtækja í fjármálageiranum auglýsti á samskiptamiðlum. Þessi tala lækkaði í 8,5% á fyrsta fjórðungi þessa árs og í 6% á öðrum fjórðungi.

Ástæðan fyrir þessu er sú, að fyrirtækin eru í mikilli óvissu um, hvort auglýsingar á þessum miðlum skili sér. Jafnframt er athyglisvert að Twitter virðist vera að ná lítilsháttar forskoti á Facebook, sem auglýsingamiðill.

SG